Доксилан 100 мг № 10 табл

Сипаттама

Дәрілік затты медициналық қолдану жөніндегі нұсқаулық

Доксилан^®

Саудалық атауы

Доксилан^®

Халықаралық патенттелмеген атауы

Доксициклин

Дәрілік түрі

100 мг таблеткалар

Құрамы:

Бір таблетканың құрамында

белсенді зат – 115,4 мг доксициклин хиклаты (100 мг доксициклинге баламалы)

қосымша заттар: микрокристалды целлюлоза, натрий крахмалының гликоляты (А типі), лактоза моногидраты, жүгері крахмалы, кремнийдің сусыз коллоидты қостотығы, гидрогенделген майсана майы, магнийстеараты

Сипаттамасы

Сары түсті, дөңгелек пішінді, екі жақ беті дөңес, бір бетінде сызығы бар таблеткалар.

Фармакотерапиялық тобы

Жүйелі қолдануға арналған инфекцияға қарсы препараттар. Жүйелі қолдануға арналған бактерияға қарсы препараттар. Тетрациклиндер. Доксициклин.

АТХ коды J01AA02

Фармакологиялық қасиеттері

Фармакокинетикасы

Пероральді түрде қабылдағаннан кейін доксициклин толық дерлік абсорбцияланады. Тамақ ішу абсорбция дәрежесіне елеулі ықпалын тигізбейді. Қан плазмасында ең жоғары концентрацияға шамамен 2 сағаттан соң жетеді.

Организм тіндеріне кеңінен өтеді, плаценталық бөгетті жарып өтеді және ана сүтінен табылады, бірақ гематоэнцефалдық бөгет арқылы нашар өтеді. Ол бауыр арқылы өтте жиналады және энтеральді жолмен кері сіңеді. Плазма ақуыздарымен байланысуы 82% құрайды. Доксициклин аздаған дәрежеде ғана метаболизденеді. Бауыр арқылы шыққаннан кейін ол ішекте хелаттар түзу жолымен белсенділігін жояды. Бүйрек функциясы қалыпты немесе креатинин клиренсі минутына 75 мл-ге дейін болғанда, пероральді дозаның 40%-ы және креатинин клиренсі минутына 10 мл-ден азырақ болғанда 1-5%-ы бүйрек арқылы 72 сағат ішінде шығарылады. Сондай-ақ 2-3%-ы өт арқылы шығарылады, ал қалдықтары белсенді емес метаболиттер түрінде шығарылады. Жартылай шығарылу кезеңі 18-22 сағатты құрайды, бүйрек функциясының ауыр жеткіліксіздігінің болуы және гемодиализ жартылай шығарылу кезеңіне елеулі ықпалын тигізеді.

Фармакодинамикасы

Доксилан – қоздырғыштардың ақуызы синтезінің басылуы есебінен бактериостатикалық әсер беретін, әсер ету ауқымы кең тетрациклиндер тобының жартылай синтетикалық антибиотигі.

Сезімтал түрлер

Аэробты грамоң микроорганизмдер: Bacillus anthracis, Listeria monocytogenes

Аэробты грамтеріс микроорганизмдер: Branhamella catarrhalis, Brucella, Calymmatobacterium granulomatis, Campylobacter fetus, Haemophilus ducreyi, Haemophilus influenzae, Rickettsia, Vibrio cholerae, Yersinia pestis

Анаэробты микроорганизмдер: Actinomyces, Clostridium, Propionibacterium acnes

Тағы басқалары: Bartonella bacilliformis, Borrelia burgdorferi, Borrelia recurrentis, Borrelia duttonii, Chlamydia, Francisella tularensis, Leptotrichia, Mycoplasma pneumoniae, Plasmodium falciparum (Chloroquin-resistent strains), Ureaplasma urealyticum

Орташа сезімтал түрлер

Аэробты грамоң микроорганизмдер: Enterococcus, Staphylococcus aureus, Streptococcus pneumoniae, Streptococcus pyogenes

Аэробты грамтеріс микроорганизмдер: Acinetobacter, Enterobacter aerogenes, Escherichia coli, Klebsiella species, Neisseria gonorrhoeae, Shigella

Анаэробты микроорганизмдер: Bacteroides, Fusobacterium species

Тағы басқалары: Treponema pallidum, Treponema pertenue

Резистентті түрлер

Аэробты грамоң микроорганизмдер: Proteus, Providencia, Pseudomona

Қолданылуы

Препаратқа сезімтал микроорганизмдерден туындаған инфекциялық-қабыну ауруларында:

- тыныс алу жолдарының инфекциялары, соның ішінде пневмония және Streptococcus pneumoniae, Haemophilus influenzae, Klebsiella pneumoniae сезімтал штаммдарынан және басқа да организмдерден туындаған тыныс алудың төменгі жолдарының басқа да инфекциялары. Mycoplasma pneumoniae. Созылмалы бронхитті, синуситті емдеу.

- несеп-жыныс жүйесінің инфекциялары: Klebsiella, Enterobacter, Escherichia coli, Streptococcus faecalis,Chlamydia trachomatis түрлерінің сезімтал штаммдарынан, соның ішінде асқынбаған уретральді, эндоцервикальді немесе ректальді инфекциялар. Ureaplasma urealyticum әсерінен туындаған гонококктік емес уретрит (Т-микоплазма). Доксилан сондай-ақ шанкроидта, шап гранулемасында және венералық гранулемада қолданылады. Доксилан созды және мерезді емдеудің альтернативті әдісі болып табылады.

- тері және жұмсақ тін инфекциялары Acne vulgaris ауыр безеу ауруы (біріктірілген ем құрамында);

- офтальмологиялық инфекциялар: сезімтал штаммдардан гонококктерден, стафилококктерден және Haemophilus influenzae штаммдарынан туындаған. Иммунофлуоресценттік талдау нәтижелері бойынша, трахома, инфекциялық агенттен туындаса да, әрдайым жоюға келе бермейді. Бөлінділері бар конъюнктивит кезінде доксиланды ішке қабылдау үшін монотерапия түрінде немесе жергілікті дәрілермен біріктіріп тағайындауға болады.

- Риккетсиандық инфекция. Жартасты таудың теңбілді қызбасы, бөртпе сүзегі тобы, ку-қызбасы, ку-қызбасы аясында эндокардит және кене қызбасы.

- басқа да аурулар: питтакоз, бруцеллез (стрептомицинмен біріктіріп), тырысқақ, бубонды оба, эпидемиялық қайталанатын сүзек және қайталанатын кене қызбасы, туляремия, сап, мелиоидоз, хлорохинге төзімді безгек, және жедел ішек амебиазы (амебицидтерге қосымша ретінде).

Доксилан лептоспирозды, газды гангренаны және сіреспені емдеудің альтернативті әдісі болып табылады.

Доксилан келесі жағдайларда профилактика үшін қолданылады: цуцугамуши (жапондық өзен қызбасы), саяхатшылардағы іш өту (энтероуытты ішек таяқшасы), лептоспироз және безгек. Безгек профилактикасын қолданыстағы нұсқаулық қағидаттарына сәйкес жүргізген жөн.

Қолдану тәсілі және дозалары

Доксиланның дозасы инфекция барысының ауырлығына және микроорганизмдердің препаратқа сезімталдығына байланысты.

100 мг таблеткаларды күндізгі уақытта, тамақ ішу кезінде, сұйықтықтың жеткілікті мөлшерімен, өңештің тітіркену және жара болуы қаупін төмендету үшін, тігінен тұрып қабылдаған жөн.

Ересектер және 12-ден 18 жасқа дейінгі балалар

Ересектерде және 12-ден 18 жасқа дейінгі балаларда жедел инфекцияларды емдеу үшін

Доксиланның әдеттегі дозасы алғашқы күні 200 мг (бір реттік доза түрінде немесе бөлінген дозалармен) тұрады, әрі қарай тәулігіне 100 мг демеуші дозаға ұласады. Инфекциялардың өте ауыр түрлерін емдеу үшін күн сайын тәулігіне 200 мг тағайындайды.

8-ден 12 жасқа дейінгі балалар

8-ден 12 жасқа дейінгі балаларда жедел инфекцияларды емдеу үшін доксициклинді пайдалану басқа препараттар қол жетімді болмаған, тиімділігі аз немесе қарсы көрсетілімдері бар болған жағдайда ғана негізделуі мүмкін.

Мұндай жағдайларда жедел инфекцияларды емдеу үшін келесі дозаларды тағайындайды:

• Дене салмағы 45 кг-ден азырақ балалар үшін – бастапқы доза: 4,4 мг/кг (бір реттік доза немесе 2 бөлікке бөлінген дозалар түрінде), кейіннен демеуші дозаны қабылдауға ұласады: 2,2 мг/кг (бір реттік доза немесе 2 бөлікке бөлінген дозалар түрінде). Инфекцияның өте ауыр түрлерін емдеу үшін 4,4 мг/кг-ге дейін тағайындауға рұқсат етілген.

• Дене салмағы 45 кг-ден асатын балалар үшін – ересектерге арналған дозада тағайындаған жөн.

Белгілі бір инфекцияларда дозалау жөніндегі нұсқаулар:

Acne vulgaris - тәулігіне 50 мг 6-12 апта бойы тамақпен немесе сұйықтықпен бірге.

Жыныстық жолмен жұғатын инфекцияларда препаратты 7 күн бойы келесі ауруларда тәулігіне екі рет 100 мг-ден тағайындау ұсынылады:

асқынбаған гонококктік инфекциялар (еркектердегі аноректальді инфекцияларда); Chlamydia trachomatis әсерінен туындаған асқынбаған уретральді, эндоцервикальді немесе ректальді инфекция; Ureaplasma urealyticum әсерінен туындаған гонококктік емес уретирит. Chlamydia trachomatis немесе Neisseria gonorrhea әсерлерінен туындаған жедел эпидидимо-орхит – 10 күн бойы тәулігіне екі рет 100 мг-ден. Біріншілік және екіншілік мерез: пенициллинге аллергиясы бар немесе біріншілік немесе екіншілік мерез диагностикаланған жүкті емес пациенттерге келесі режимді тағайындауға болады: пенициллинмен емдеудің альтернативасы ретінде екі апта бойы тәулігіне екі рет 200 мг доксициклин.

Эпидемиялық қайталанатын сүзек және қайталанатын кене қызбасы – ауырлық дәрежесіне байланысты бір реттік 100 немесе 200 мг доза.

Хлорохинге төзімді безгекті емдеу - ең кемінде 7 күн бойы күніне 200 мг. Инфекциялардың потенциалды ауырлығына байланысты, тез әсер ететін шизонтоцидті дәрілерді, мысалы, хининді, әрдайым доксициклинмен бірге тағайындаған жөн.

Ересектер және 12 жастан асқан балалар үшін безгектің профилактикасына күн сайын 100 мг. Профилактиканы безгек жұқтыру қаупі бар аудандарға барудан 1-2 бұрын бастауға болады. Профилактикалық дозаны безгек жұқтыру қаупі бар аудандарға барған кезде күн сайын және ол жақтан қайтқаннан кейін 4 апта бойы қабылдайды.

Жапондық өзен қызбасының профилактикасы үшін - 200 мг бір реттік доза түрінде.

Ересек саяхатшыларда диареяның профилактикасы үшін саяхаттың алғашқы күні200 мг (бір реттік доза түрінде немесе әрбір 12 сағат сайын 100 мг-ден), содан кейін қауіпті ауданға келген күндердің барлығында күн сайын 100 мг-ден. Дәрілік түрлерді 21 күн бойы профилактикалық пайдалану жөнінде деректер жеткіліксіз.

Лептоспироздың профилактикасы үшін қауіпті ауданда болған күндері аптасына бір рет 200 мг және қайтып оралғаннан кейін 200 мг. Дәрілік түрлерді 21 күн бойы профилактикалық пайдалану жөнінде деректер жеткіліксіз.

Егде жастағы адамдарда қолдану

Доксиланды дозаны түзетпей және қандай да болсын сақтық шараларын орындамай-ақ егде жастағы адамдарға тағайындай беруге болады. Бүйрек функциясы жеткіліксіз болған жағдайда дозаны түзету қажет емес.

Жартасты таулардың теңбіл қызбасы

Ересектер: әрбір 12 сағат сайын 100 мг-ден.

Балалар: дене салмағы 45 кг-ден азырақ: тәулігіне екі рет дене салмағына шаққанда 2,2 мг/кг. Дене салмағы 45 кг-ден асатын балалар ересектердің дозасын қабылдауы керек.

Пациенттер емдеуді қызба симптомдарына құтылғаннан кейін және клиникалық жақсаруға айғақтамалар алынғанға дейін, ең жоқ дегенде, тағы 3 күн жалғастырғаны жөн. Емдеудің ең төмен курсы – 5-7 күн.

Жағымсыз әсерлері

Жағымсыз әсерлері төменде MeDRA жүйелік-ағзалық жіктеуге сәйкес және туындау жиілігі бойынша берілген.

Туындау жиілігі: өте жиі (≥1/10), жиі (≥1/100, <1/10), жиі емес (≥1/1 000, <1/100), сирек (≥1/10 000, <1/1 000), өте сирек (<1/10 000), жағдайлары белгісіз (қолда бар деректермен баға беру мүмкін емес).

Жиі ( > 1/100-ден < 1/10 дейін)

- жүректің айнуы, қыжыл, метеоризм, стеаторея

Жиі емес ( > 1/1,000-нан < 1/100 дейін)

-бас ауыру, бас айналу, вестибулярлық бұзылулар

- құсу, диарея, стоматит, глоссит, дисфагия, фарингит, қарлығу, жұтынудың қиындауы

- фотосенсибилизация (күн сәулесінің әсерінен терінің күюі: қызару, ісіну, көпіршіктердің түзілуі, тері түсінің өзгеруі)

- тырнақтар тарапынан өзгерулер болатын фотоуытты реакциялар – тырнақтың тырнақ орнынан ажырауы және тырнақ пластинасы түсінің өзгеруі

- макулопапулездік және эритематоздық бөртпе

- аллергиялық реакциялар, жайылған экзантема, эритема, есекжем, Квинке ісінуі, анафилаксия, анафилактоидты пурпура, жүйелік қызыл жегінің өршуі, терінің қышуы, мультиформалы экссудативті эритема, терінің, шырышты қабықтардың немесе буындардың (ангионевроздық ісіну) қайтымды жергілікті ісінулері, демікпе, анафилаксиялық шок, жыныс мүшелерінде және дененің басқа да жерлерінде тұрақты дәрілік бөртпе, қызбамен, бас ауырумен және буындардың ауыруымен қатар жүретін сарысу құю ауруына ұқсас реакция

- перикардит

- остеогенездің баяулауы, балаларда тістердің қалыпты дамуының бұзылуы

- қан ұюдың бұзылулары және гематурия

- ауыз бен жұтқыншақтың шырышты қабығының қабынуы (стоматит, глоссит), сыртқы жыныс мүшелерінің және әйелдерде қынаптың жедел қабынуы (вульвовагинит), сондай-ақ анальді аймақтағы (Pruritus ani) қышыну сияқты симптомдармен қатар жүретін терінің және шырышты қабықтардың (әсіресе жаныс мүшелерінің және ауыз бен ішектің шырышты қабықтарының) кандидозы

- жүктілік кезеңінде және 8 жасқа дейінгі балаларда сүйектердің өсуінің бәсеңдеуі, тіс жару кезінде қолданғанда эмалдің ақауланып, тістер түсінің қайтымсыз өзгеруі.

Сирек (> 1/10,000-нан < 1/1000 дейін)

- ересек пациенттерде бассүйекішілік қысымның қатерсіз жоғарылауы (бас ауыру, жүректің айнуы, көру жүйкесі дискісінің ісінуі, көрудің бұзылуы, мысалы, диплопия) түрінде көрініс беретін бассүйекішілік қатерсіз гипертензия, парестезия, иіс және дәм сезу сезімінің бұзылуы немесе жоғалуы.

- гемолиздік анемия, тромбоцитопения, нейтропения, эозинофилия, лейкоцитоз, атипиялық лимфоциттер және гранулоциттердің түйіршікті уыттылығы, лимфоцитопения, лимфаденопатия.

- C. difficile уытының әсерінен туындаған іштің ауыруы, дисфагия, диспепсия, энтероколит, жалған жарғақшалы колит, диарея; эзофагит және өңештің жара болуы, анорексия

- бауырдың зақымдануы, гепатит, гепатоуыттылық, панкреатит

- нефроуыттық зақымданулар, бұрыннан бар бүйрек ауруының өршуі, интерстициальді нефрит, бүйрек функциясының жедел жеткіліксіздігі, анурия

- аса жоғары сезімталдықтың беттің ісінуі, тілдің ісінуі, көмей ішінің ісініп, тыныс алу жолдарын тарылтуы, жүрек қағуының жиілеуі, тұншығу (ентігу), артериялық қысымның шокқа және жүректің тоқтап қалуына дейін түсіп кетуі сияқты ауыр жедел симптомдары

- полиморфты эритема, эксфолиативті дерматит, Стивен-Джонсон синдромы және уытты эпидермальді некролиз (Лайелл синдромы)

- парестезиялар, тахикардия, перикардит, құлақтың шуылдауы, миалгиялар, артралгиялар, мазасыздық, қорқыныш жағдайы, қан кернеулері

- препараттың антианаболиялық әсерінің себебінен мочевинаның қалдық азотының артуы

- нәрестелерде еңбектің томпаюы (препарат қабылдауды тоқтатқаннан кейін симптомдары тез жоғалды).

- ректальді және/немесе генитальді аймақтың қабынуы

Ұзақ уақыт қолданғанда тетрациклиндер қалқанша бездердің микропрепараттарында, оның функциясын бұзбай, тіндердің қою-қоңыр түске бояйтыны мәлімделді.

Өте сирек (< 1/10,000)

- алыстан нашар көру, транзиторлық миопия

- эпилепсиялық ұстамалар

- бүйректің зақымданулары, мысалы, интерстициальді нефрит, бүйрек функциясының жедел жеткіліксіздігі, анурия

Жиілігі белгісіз

Тіс эмалі түсінің тұрақты өзгеруі.

Доксициклинді қолданған кезде тұрақты тістердің қайтымды және сыртының өзгергендігі жөнінде мәлімдемелер түсті, бірақ жиілігіне қолда бар деректер негізінде баға беру мүмкін емес.

Қолдануға болмайтын жағдайлар

- тетрациклиндерге және препараттың кез келген компонентіне жоғары сезімталдық

- 8 жасқа дейінгі балаларға

- жүктілік және лактация кезеңі

- порфирия

- лейкопения

- бауыр және/немесе бүйрек функциясының ауыр жеткіліксіздігі

- тұқым қуалайтын фруктоза жақпаушылығы, Lapp-лактаза ферментінің тапшылығы, глюкоза-галактоза мальабсорбциясы бар адамдарға

Дәрілермен өзара әрекеттесуі

Сіңуі:

Сүт, сүт өнімдері, құрамында алюминий, кальций, магний, сондай-ақ темір тұздары және висмут препараттары бар антацидтер доксициклиннің сіңуінің төмендеуіне әкелуі мүмкін, сондықтан оларды бір мезгілде қабылдамаған жөн. Аниониттерді (холестирамин, холестипол) доксиланды қабылдағаннан кейін 2 сағаттан соң қабылдау керек, өйткені олар доксициклиннің сіңуін нашарлатуы мүмкін.

Метаболизмі:

Карбамазепин, фенитоин, барбитураттар, примидон немесе рифампицин сияқты ферменттерді индукциялайтын препаратты ұзақ мерзім қабылдау бауырда доксициклиннің метаболизмін жылдамдатуы мүмкін және плазмадағы концентрациясының азаюына әкелуі мүмкін. Созылмалы маскүнемдікке де қатысты солай.

Доксициклин диабетке қарсы пероральді препараттардың гипогликемиялық әсерін арттыруы мүмкін.

Тетрациклинді оральді контрацептивтермен бір мезгілде қолдану олардың контрацепциялық әсерінің төмендеуіне әкелуі мүмкін.

Тетрациклиндер бауырда секале-алкалоидтардың метаболизмін тежеуі мүмкін, бірлі-жарым жағдайларда қантамырлардың спазмымен және гипоперфузиямен бірге эрготизм болуы ықтимал.

Доксициклинді басқа потенциалды гепато- және нефроуытты заттармен бірге пайдаланбау керек, өйткені олар бүйрекке жағымсыз әсерін тигізуі мүмкін.

Бактериостатикалық антибиотиктер бета-лактамдық антибиотиктердің бактерицидтік әсеріне кедергі келтіретін болғандықтан, оларды қатар қабылдау пайдалы болып табылмайды.

Доксициклинді метотрексатпен бір мезгілде қолдану оның уыттылығын арттыруы мүмкін.

Доксициклин циклоспориннің иммуносупрессиялық әсер етуші агентінің уытты әсерін арттыруы мүмкін.

Дигитоксиннің сіңуі тетрациклиндерді бір мезгілде қабылдаумен азаюы мүмкін.

Поляризацияланбаған миорелаксантами (мысалы, тубокураринмен және галламинмен) жүйке-бұлшықеттік тежелуі арттырылуы мүмкін.

Теофиллинді және тетрациклинді бір мезгілде қолдану асқазан-ішектік жағымсыз әсерлердің жиілігін арттыруы мүмкін.

Доксициклин несептегі ақуызды, қантты және уробилиногенді талдау нәтижелерін, сондай-ақ несептегі катехоламиндердің анықталуын бұрмалауы мүмкін.

Акнені изотретиноинмен емдеуге дейін, емдеу кезінде немесе емдеуден кейін көп ұзамай доксициклинді пайдаланбау керек, өйткені агенттер бассүйекішілік қысымның қайтымды жоғарылауын (мидың жалған ісігін) сирек туындатады.

Коагуляция:

Тетрациклиндер плазма протромбинінің белсенділігін бәсеңдетеді және антикоагулянттардың белсенділігін арттырады. Антикоагулянттарды бір мезгілде қолданған жағдайда олардың дозаларын төмендету қажет болуы мүмкін.

Зертханалық зерттеу нәтижелеріне ықпалы:

Несептегі глюкоза деңгейін анықтау үшін, егер Бенедикт сынамасы немесе глюкозооксидазалық әдіс пайдаланылса, тест нәтижелері жалған-оң немесе жалған-теріс болуы мүмкін.

Сондай-ақ флуоресценттік әдіспен анықтағанда несептегі катехоламиндердің деңгейі жалған жоғарылауы мүмкін.

Айрықша нұсқаулар

Тәулігіне 300 мг-ден астам дозада ұзақ уақыт емдеген жағдайда бүйректің функциясын және қан құрамын тексерген жөн.

Пациенттер тетрациклиндермен емдеген кезде күн сәулесінің немесе УК сәулеленудің фотосезімталдық реакциясын туындатуы мүмкін екендігін білуі тиіс. Теріде алғаш эритема пайда болған кезде емдеуді тоқтату керек.

Бүйрек функциясы бұзылған пациенттерде дозаны төмендету қажет емес.

Антибиотиктерді пайдалану кейде суперинфекцияға әкеп соғатын сезімтал емес организмдердің шамадан тыс өсуіне әкелуі мүмкін. Тиісті ем жүргізуды бастау керек.

Ауыр және тұрақты диарея жағдайында антибиотиктердің әсерінен туындаған, өмір үшін қауіпті болуы мүмкін жалған жарғақшалы колитті ескерген жөн. Сондықтан дәрілік затты қабылдауды дереу тоқтату және тиісті ем жүргізуді (мысалы, ванкомицинмен) бастау қажет. Перистальтиканы туындататын препараттарды қолдануға болмайды.

Бауыр функциясы бұзылған пациенттерге сақтықпен қолдану керек.

Балаларға қолдану

Басқа да тетрациклиндер сияқты, доксициклин сүйекті түзетін тіндерде кальцийдің тұрақты кешенін түзеді. Тетрациклинді дене салмағына шаққанда 25 мг/кг дозада пероральді түрде қабылдап жүрген шала туған балаларда, препаратты қабылдауды тоқтатқаннан кейін пайда болатын, жіліншік сүйегі өсуінің баяулағаны байқалды.

Тіс жару кезінде (жүктіліктің екінші жартысы және 8 жасқа дейінгі балалық кезең) тетрациклиндерді пайдалану тістердің түсінің қайтымсыз (сары-сұр-қоңыр түс) өзгеруін туындатуы мүмкін. Бұл жағымсыз әсер қысқа мерзімдік еммен салыстырғанда, ұзақ емдеген кезде жиі байқалды. Сондай-ақ тіс эмалінің гипоплазиясы білінді. Пациенттердің осы тобында доксициклинді қолдануға болмайды.

Дегенмен, пациенттердің осы тобында доксициклин сібір жарасын немесе ингаляцияға байланысты ойық жараны емдеген кезде пайдаланылуы мүмкін.

«Доксилан» 100 мг таблеткасының құрамында лактоза бар. Лактоза жақпаушылығы, Лапп лактаза тапшылығы немесе глюкоза-галактоза сіңуінің бұзылуы сияқты сирек тұқым қуалайтын пациенттер осы препаратты қабылдамағандары жөн.

Яриш-Герксгеймер реакциясы – спирохетозбен, сондай-ақ мерезбен, боррелиозбен, менингококктік менингитпен ауыратын науқастарды бактерияларға қарсы спецификалық дәрілермен емдеуді бастағаннан кейін бірнеше сағаттан соң пайда болатын реакция, аурудың бактериялық қоздырғыштары жаппай қырылған кезде антигендердің, эндотоксиндердің тез босап шығуымен байланысты, бұл иммундық жауаптың бақыланбауына әкеледі. Температураның жоғарылауымен, қалтыраумен, артериялық қысымның төмендеуімен, тахикардиямен, жүректің айнуымен, бас ауырумен, бұлшықеттердің ауыруымен, бұрыннан барларының үдеуімен немесе негізгі аурудың жаңа симптомдарының пайда болуымен көрініс береді. Антибиотиктерді енгізуге аллергиялық реакция болып табылмайды – әрі қарай антибиотикотерапия қажет.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

Сирек жағдайларда тетрациклиндермен емдеген кезде уақытша алыстан көрмеу байқалды, бұл автокөлікті жүргізгенде және механизмдерді басқарғанда қауіпсіздіктің бұзылуына әкелуі мүмкін.

Артық дозалануы

Симптомдары: препараттың жағымсыз әсерлерінің күшеюі, күшті артық дозалану бауырды зақымдауы мүмкін, ол панкреатитпен қатар жүруі мүмкін, протромбин уақытының артуы.

Емі: пероральді артық дозалану жағдайында сіңбейтін геклат ретінде доксициклиннің қалдықтарын байланыстыру үшін антацидтерді немесе кальций және магний сульфаттарын тағайындаған жөн. Жиі туындайтын жағымсыз әсерлердің (мысалы, гипоксия, жүрек аритмиясы, асқазанның тесілуі, ларингоспазм, электролиттік теңгерімнің бұзылуы немесе асқазанның ішіндегі заттың ағуы) пайда болуына байланысты асқазанды шаю ұсынылмайды.

Доксициклиннің жеткілікті диализденуі мүмкін емес, сондықтан гемо- немесе перитонеальді диализ артық дозалануды емдеген кезде тиімді емес.

Жоғары дозаларды енгізген кезде панкреатитпен қатар жүретін бауырдың зақымдануы туындауы мүмкін.

Шығарылу түрі және қаптамасы

Поливинилхлоридті үлбірден және лакталған баспалы алюминий фольгадан жасалған пішінді ұяшықты қаптамада 10 таблеткадан.

Пішінді ұяшықты 1 қаптама медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«G.L. Pharmа GmbH.», Industriestraße 1, A-8502 Lannach, Австрия

Тіркеу куәлігінің ұстаушысы

«ВАЛЕАНТ» ЖШҚ, Ресей, Мәскеу.

Қазақстан Республикасы аумағында тұтынушылардан өнім (тауар) сапасы жөніндегі шағымдарды қабылдайтын және тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс жасау деректері (телефон, факс, электронды пошта)

«Валеант» ЖШС

Қазақстан, 050059, Алматы қ.,

проспект Әл-Фараби даңғылы, «Нұрлы Тау» бизнес орталығы, Блок 4Б,кеңсе 1104

Телефон+7 727 3111 516,+ 7 727 329 0045,факс +7 727 3 111 517

Электронды пошта:Оffice.KZ@valeant.com

Дәріханалар