Раунатин 2 мг, №20, табл.

Сипаттама

Саудалық атауы

Раунатин-Здоровье

Халықаралық патенттелмеген атауы

Жоқ

Дәрілік түрі

Қабықпен қапталған 2 мг таблеткалар

Құрамы

Бір таблетканың құрамында:

белсенді зат – алкалоидтардың 100% мөлшеріне шаққанда 2 мг раунатин,

қосымша заттар: қант, картоп крахмалы немесе жүгері крахмалы, глюкоза, кальций стеараты, стеарин қышқылы, вазелин майы;

қабықтың құрамы: қант, жеңіл магний карбонаты, титанның қостотығы (Е 171), повидон, сиковит бояғышы Green Z 2755, тальк, коллоидты кремнийдің қостотығы, ара балауызы, вазелин майы.

Сипаттамасы

Екі жақ беті дөңес, ашық-жасыл түсті қабықпен қапталған таблеткалар. Таблетканың беті мәрмәрлі және теңбілдер болуы мүмкін. Көлденең кесіндісінен үш қабат көрінеді.

Фармакотерапиялық тобы

Жүрек-қантамыр жүйесі. Гипертензияға қарсы препараттар. Орталықтық әсер ететін антиадренергиялық препараттар. Раувольфия алкалоидтары. Раувольфия алкалоидтарының қосындысы.

АТХ коды C02AA04

Фармакологиялық қасиеттері

Фармакокинетикасы

Раувольфия алкалоидтары асқазан-ішек жолынан жақсы сіңеді. Қанда ең жоғары концентрация препаратты қабылдағаннан кейін 1–3 сағаттан соң байқалады. Қан ақуыздарымен байланысуы 40–50% құрайды. Жартылай шығарылу кезеңі – 50–170 сағат. Ішекте және бауырда метаболизденеді; негізінен, нәжіспен, сондай-ақ несеппен бірге шығарылады.

Фармакодинамикасы

Препараттың құрамында жылан раувольфиясы (Rauwolfia serpentina Benth.) тамырынан немесе кутр (Apocynaceae) тұқымдасына жататын құстыратын раувольфия (Rauwolfia vomitoria Afz) тамырының қабығынан алынған алкалоидтар жиынтығы бар. Алкалоидтар резерпин, серпентин, аймалин және басқа түрлерде берілген. Алкалоидтардың жалпы мөлшері – 90%-дан кем емес.

Раунатиннің орталық жүйке жүйесінде (кортико-гипоталамустық құрылымдарда, әсіресе гипоталамустың артқы бөлігінде) биогендік моноаминдер (норадреналин, дофамин, серотонин) мөлшерінің төмендеуінен болатын гипотензиялық әсері бар. Шеткері адренергиялық жүйке ұштарының, қантамырлық қабырғаларының пресинапстық жарғақшалары везикулаларында медиатор жинақталуы үдерісін бұза отырып, бүйрекүсті безінің ми қабаттарында препарат адренергиялық берілімді бөгейді, бұл артериялық қысымның біртіндеп төмендеуіне әкеледі. Препараттың гипотензиялық әсері, резерпинге қарағанда, біртіндеп пайда болады, бірақ айқындылығы жөнінен резерпиннен едәуір кем түспейді. Препараттың ерекшелігі бүйректе шумақтық сүзілудің күшеюі болып табылады, бұл бүйректегі қан айналымының артуына әкеледі.

Препараттың аритмияға қарсы әсері және орталық жүйке жүйесінде тыныштандыратын әсері де бар. Препараттың седативтік әсері резерпинге қарағанда аз дәрежеде білінеді.

Препараттың емдік әсері оны қолдана бастағаннан кейін 10–14 күнге қарай біртіндеп пайда болады және 2–3 ай бойы сақталады.

Бірқатар жағдайларда раунатиннің жағымдылығы резерпинге қарағанда өте жақсы болады.

Қолданылуы

- жеңіл және орташа дәрежедегі артериялық гипертензияда

Қолдану тәсілі және дозалары

Ересектерге тамақтанудан кейін ішке қабылдауға тағайындайды.

1-ші күнібастапқы доза әдетте түнге қарай 1 таблетканы құрайды, 2-ші күні – тәулігіне 2 рет 1 таблеткадан; 3-ші күні – тәулігіне 3 рет 1 таблеткадан, содан кейін жалпы дозаны тәулігіне 4–6 таблеткаға жеткізеді. Ең жоғары бір реттік доза – 2 таблетка, ең жоғары тәуліктік доза – 6 таблетка.

Тұрақты емдік әсерге жеткеннен кейін (әдеттегідей, 10–14 күннен соң) препарат дозасын тәулігіне 1–2 таблеткаға дейін біртіндеп азайтады. Емдеу курсы – 3–4 апта, бірақ бірқатар жағдайларда препаратты демеуші дозада (күніне 1 таблетка) ұзақ қабылдайды.

Бір реттік және тәуліктік дозаны, сондай-ақ емдеу ұзақтығын дәрігер әр адамға жекелей белгілейді.

Жағымсыз әсерлері

Сирек

- жүрек айнуы, құсу, диарея, іштің ауыруы, тәбеттің жоғарылауы немесе төмендеуі

- бас ауыру, тершеңдік, жалпы әлсіздік, ұйқышылдық, депрессия

- брадикардия

- аллергиялық реакциялар (тері бөртпелері, қышыну, шырышты қабықтардың құрғауы, мұрын шырышты қабығының ісінуі)

- миоз

- дизурия, натрий іркілуі

- импотенция, либидоның төмендеуі, пролактин секрециясының жоғарылауы, галакторея, гинекомастия, сүт безінің қатаюы, дене салмағының артуы

- тромбоцитопениялық пурпура
Ұзақ уақыт қолданғанда болуы мүмкін

- жүрек тұсындағы ауырудың күшеюі (стенокардиясы бар науқастарда)

- стенокардия ұстамаларының жиілеуі

- ісінулер, бетке қан тебулер

- бауыр функциясының бұзылулары

- қорқынышты түстер көре бастау

- паркинсонизм симптомдарының пайда болуы

Әдетте жағымсыз құбылыстар дозаны азайтқанда немесе препарат қабылдауда қысқа мерзімдік (1-3 күн) үзіліс жасаудан кейін жоғалады.

Қолдануға болмайтын жағдайлар

- раувольфия алкалоидтарына немесе препараттың басқа компоненттеріне жекелей жоғары сезімталдық

- глюкоза-галактоза мальабсорбциясы бар адамдарға

- артериялық гипотензия

- жүрек функциясының жеткіліксіздігі, жүректің органикалық зақымдануы, брадикардия, қолқа ақаулары

- айқын церебральді атеросклероз

- депрессия

- эпилепсия, паркинсонизм

- асқазан мен он екі елі ішектің ойық жаралы ауруының өршу сатысы

- нефросклероз

- бронх демікпесі

- жүктілік және лактация кезеңі

- феохромоцитома

- 18 жасқа дейінгі балалар

Дәрілермен өзара әрекеттесуі

Раунатиннің гипертензиға қарсы әсері басқа антигипертензивтік дәрілермен (тиазидтік диуретиктермен, b-адреноблокаторлармен, антиотензин өзгертуші фермент тежегіштерімен, кальций иондарының антагонистерімен және т.б.) бірге қолданғанда күшейеді. Орталық жүйке жүйесіне алкогольдің, барбитураттардың, антидепрессанттардың тежегіш әсерін күшейтеді, моноаминооксидаза тежегіштерімен бір мезгілде қолданғанда қозу және гипертензия пайда болуы мүмкін. Паркинсонға қарсы дәрілердің және симпатомиметиктердің тиімділігін төмендетеді. Дигиталис препараттары және хинидин раунатинмен бір мезгілдеқолданғанда аритмияны туындатуы мүмкін.

Айрықша нұсқаулар

Препаратпен емдеу дәрігердің бақылауымен жүргізілуі тиіс. Стенокардиясы бар науқастарда жүрек тұсындағы ауыру күшеюі мүмкін. Раувольфия алкалоидтары ас қорыту жолының жиырылуын және секрециясын арттыратын болғандықтан, препаратты ойық жара ауруының анамнездік деректері бар науқастарға қолданғанда сақ болған жөн.

Қант диабеті бар науқастарға сақтықпен тағайындау керек.

Сондай-ақ препаратты әлсіз науқастарға және егде жастағы пациенттерге, бүйрек жеткіліксіздігінде, өт-тас ауруында, аритмияларда және жақын арада миокард инфарктісін өткерген пациенттерге тағайындағанда аса сақ болған жөн.

Жоспарлы операциялық араласым алдында препаратты операциядан бірнеше күн бұрын тоқтатқан жөн. Раунатин қабылдап жүрген науқастарда жалпы наркозбен шұғыл операция жасау қажет болғанда атропинмен премедикация қажет. Препаратты электроимпульсті ем сеансы алдында қолданбаған жөн.

Педиатрияда қолданылуы

Препаратты балаларға қолдану жөнінде деректер жоқ.

Жүктілік және лактация кезеңі

Препаратты жүктілік және емшек емізу кезеңінде қолдануға болмайды, өйткені алкалоид резерпин плацента арқылы және емшек сүтіне өтеді. Препаратты лактация кезеңінде қолдану қажет болғанда бала емізуді тоқтата тұрған жөн.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препарат, әсіресе емнің бас кезінде, пациенттің реакция жылдамдығын нашарлатуы мүмкін, соның салдарынан препаратпен емделу курсы кезінде пациенттер зейін қоюды және психомоторлы реакциялар жылдамдығын қажет ететін қауіптілігі зор қызмет түрлерін тоқтатқаны жөн.

Артық дозалануы

Симптомдары: тершеңдік, жалпы әлсіздік және айқынгипотензия. Ауыр жағдайларда қысқа кезеңдік эйфориядан кейін ұйқышылдық, депрессия, гиподинамия, айқын паркинсонизм құбылыстары, құрысулар, тыныстың тарылуы, гипотермия, естен тану, кома пайда болады.

Емі: препаратты тоқтату, асқзанды шаю, белсенділендірілген көмір қабылдау. Қарқынды диурез қолданылады. Артериялық қысым айқын төмендегенде, коллапста науқасты аяғын көтеріңкіреп жатқызған жөн. Қажет болған кезде реополиглюкинді немесе ангиотензинамид қосылған мезатонды немесе 2% норадреналин гидротартраты ерітіндісін көктамыр ішіне енгізу керек. Адреномиметикалық дәрілерді өкпедің ісінуі мүмкін болғандықтан, аса сақтықпен тағайындайды. 10% кофеин-натрий бензоаты ерітіндісін тері астына енгізеді. Тыныс алудың күрт тежелуі немесе оның кідіруі тыныс жолдарынан шырыштарды сорып алуды, интубацияны және өкпеге жасанды желдету жүргізуді, оксигенотерапияны қажет етеді.

Раунатинмен және басқа раувольфия препараттарымен уланғанда қолданылатын арнайы антидоты жоқ.

Шығарылу түрі және қаптамасы

10 немесе 20 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салынған.

10 таблеткадан 5 пішінді ұяшықты қаптама немесе 20 таблеткадан 1 пішінді ұяшықты қаптама медициналық қолдану жөніндегі мемлекеттік және орыс тіліндегі нұсқаулықпен бірге картон қорапқа салынған.

Қорапқа салынбаған 10 таблеткадан немесе 20 таблеткадан пішінді ұяшықты қаптаманы медициналық қолдану жөніндегі мемлекеттік және орыс тіліндегі нұсқаулықтың тиісті санымен гофрланған картон жәшікке тұтынушының келісімімен салуға болады.

Сақтау шарттары

Жарықтан қорғалған жерде, 25 ⁰С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

“Здоровье” Фармацевтикалық компаниясы” ЖШҚ.

Украина, 61013, Харьков қ-сы, Шевченко к-сі, 22.

Тіркеу куәлігінің ұстаушысы

“Здоровье” Фармацевтикалық компаниясы” ЖШҚ, Украина

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Фарм-Евро» ЖШС

050039, Алматы қ., Майлин к-сі, 72 үй, 34 пәтер

Тел.: +7(727) 271-10-17

Факс: +7(727) 271-84-97

E-mail: farmevro@mail.ru